इटहरीको बजेटमा झण्डै १४ करोड थप संशोधनसहित बजेट पारित

  • प्रकाशित मितिः असार 22, 2075
  • 84 पटक पढिएको
  • मधेश स्पेशल

इटहरी/ इटहरी उपमहानगरपालिकाले आगामी आर्थिक वर्षका लागि १ अर्ब ५० करोड ८९ लाख ४ हजार रुपैयाँको संशोधित बजेट पारित गरेको छ । उपमहानगरको तेस्रो नगरसभाबाट सो बजेट पारित भएको हो । यसअघि असार १० गते नगरले १ अर्ब ३७ करोड १० लाख ५८ हजार रुपैयाँको बजेट सार्वजनिक गरेको थियो ।

बजेट सार्वजनिक भएपछि पनि संघ र प्रदेशबाट अनुदान थपिएपछि बजेटको आकार १३ करोड ७८ लाख रुपैयाँभन्दा बढीले बढेको हो । जसमध्ये चालु खर्चतर्फ २० दशमलव २८ प्रतिशत, पूँजीगत खर्चतर्फ ७९ दशमलव ३४ प्रतिशत र वित्तीय व्यवस्थापनतर्फ ० दशमलव ५ प्रतिशत विनियोजन भएको बिहीबार आयोजित पत्रकार भेटघाट कार्यक्रममा उपमेयर लक्ष्मी गौतमले बताइन् ।

औपचारिक रूपमा १ महिना लोकतान्त्रिक पद्धतिको अभ्यास गरी बजेट ल्याइएको गौतमले बताइन् । १० गते बजेट प्रस्तुत भए पनि ११ गते संघ र प्रदेश सरकारबाट केही रकम थप आउने जानकारी आएपछि असार १८ र २० गते बसेको कार्यपालिकाको बैठकले संशोधित बजेट पास गरेको उनको भनाइ छ ।

बजेट विनियोजन हुँदा वडा नम्बर १० लाई कम बजेट विनियोजन गरिएको भनी वडाध्यक्षले सामाजिक सञ्जालमार्फत् विरोध गरेको विषयमा जिज्ञासा राख्दा गौतमले त्यसको समाधान भइसकेको बताइन् । ‘हतारमा बजेट विनियोजन गर्दा सो वडालाई मार्का परेको रहेछ,’ गौतमले भनिन्, ‘तर, अहिले सो वडालाई बजेट बढेर गएको छ ।’

जनसंख्याको आधारमा बजेट विनियोजन
गौतमका अनुसार नगरले जनसंख्याको आधारमा वडास्तरीय बजेट विनियोजन गरेको छ । यसरी विनियोजन गर्दा न्यूनतम ६५ लाखदेखि अधिकतम १ करोड रुपैयाँसम्म वडास्तरीय योजनामार्फत् बजेट विनियोजन भएको उनले बताइन् । वडा नम्बर २, ४, ५ र २० लाई बढी बजेट विनियोजन गरेको उनको भनाइ थियो ।

नगरस्तरीय योजना भने महत्वका आधारमा वर्गीकरण गरी बजेट छुट्याइएको उनको भनाइ छ । नगरस्तरीय योजनामा छुट्टिएको बजेट सो वडाको लागि मात्रै महत्वपूर्ण नभई नगरकै लागि र कतिपय अवस्थामा प्रदेशकै लागि महत्वपूर्ण हुने हुनाले यसमा योजनाको प्रकृति अनुसार बजेट विनियोजन गरिएको उनले बताइन् । विशेष गरी नगरका गौरवका आयोजनामा यस्तो बजेट विनियोजन गरेको उनले जनाइन् ।

के के छन् गौरवका योजना
इटहरीलाई नसुत्ने शहर बनाउन नमूना रात्रिबजार सञ्चालन, जनता पार्क निर्माण, बहुजातीय संग्रहालय निर्माण, औद्योगिक ग्राम स्थापना, सार्वजनिक शौचालय निर्माण, तालतलैयाको स्तरोन्नति लगायतका योजना गौरवका योजनाअन्तर्गत रहेका र त्यसका लागि नगरस्तरीय बजेटमार्फत् खर्च हुने गरी रकम विनियोजन गरिएको उनले बताइन् ।

थप योजना
इटहरीलाई हरित नगरी बनाउने नगरको योजना रहेको र त्यसअनुसार हरेक नवजात शिशुको न्वारानको दिन बिरुवा रोप्ने अभियान सञ्चालन गरिने बताइएको छ । सडक पिच गरेपछि अन्तिम भुक्तानी दिँदा सडकको दुवैतर्फ बिरुवा रोपेका सडकका उपभोक्ता समितिलाई मात्रै रकम दिने, घर निर्माण सम्पन्नको प्रमाण दिनुपर्दा पनि २ वटा बिरुवा रोपेको प्रमाणपछि मात्रै दिने नीति पनि नगरले लिएको गौतमले जनाइन् । इटहरीका विपन्न सुत्केरीका लागि थप १ हजार रुपैयाँ उपलब्ध गराउने योजना रहेको पनि उनले खुलाइन् ।

प्रतिक्रिया दिनुहोस


Copyright © 2017 - Madheshspecial.com All rights reserved