मिथिलामाथि मधेश सवार

अर्जुन प्रसाद गुप्ता (दर्दिला)
सम्पादकीय
मधेश हालकोे विषय हो,मिथिला पौराणिक विषय हो । मधेश नेपालमा मात्रै छ,मिथिला नेपाल र भारत दुईटै देशमा रहेको छ । हाल प्रदेश नम्बर २ मा प्रदेशको नामाँकरण मधेश प्रदेश गरेकोमा धेरै नै विवाद रहेको देखिन्छ । मधेश नेपालको मेचीदेखि महाकालीसम्म फैलिएको छ,जसमा २२ जिल्ला रहेका छन् । तर हाल २ नम्बर प्रदेश सरकारले ८ जिल्लालाई मधेश नामाँकरण गरी बाँकी रहेका १४ जिल्लाका मधेश र मधेशीलाई उपहास गरेको छ । यसले गर्दा मधेश प्रदेशमा परेका ८ जिल्लामा पसरिएका दुई क्षेत्रीय पहिचान गोण भएका छन् । एक मिथिला र भोजपुरा को पहिचान गौण भए । यसले गर्दा मधेश आन्दोलनका पहिचानका मुद्दा विवादित देखियो ।

मिथिलको इृतिहास ८ हजार वर्ष पुरानो छ । मिथिलालाई विश्वले परापुर्वकालदेखि पौराणिक दृष्टिले देखिरहेको छ । यहाँका संस्कृती कला, मिथिला पेन्टिगं,भाषा साहित्य,पहिरणमा आफनै मौलिकता झलकिन्छ । मिथिलाका एउटा पर्यटन क्षेत्रको रुपमा रहेको छ र गौरवशाली पहिचान बनाउन सफल छ । यस्तो गौरवशाली पहिचानलाई गौण राखी मिथिलाको उपहास गरिने कार्य कदापि उचित हुन सक्दैन । यहाँका भाषा साहित्यलाई गोण राख्नु भनेको मिथिलाका गौरवशाली पहिचानलाई दबाउन खोज्नु देखिन्छ ।

कुनै पहिचानलाईं दबाएर सापटमा लिएको पहिचानलाई स्थापित गर्न खोज्नु कदापि पहिचानको पक्षधर बुझिदैन । कता कता यसमा पनि दासत्वको गन्ध आउँछ । पहिचान भनेको मौलिकताको विषय हो,सापट भनेको पराधिन्ताको विषय हो ।