तथ्यांकमा काेराेना भाइरस - COVID - 19

उपेन्द्र भर्सेस महन्थ मधेसमा को बलियो ? पत्तासाफ गर्ने दुबैको दाबी

  • प्रकाशित मितिः आश्विन 1, 2078
  • मधेश स्पेशल
  • 297 पटक पढिएको

अध्यादेश आएपछि फुटेका नेकपा एमाले र नेकपा एकीकृत समाजवादीबीच सार्वजनिक फोरमहरुमा चर्को भनाभन भइरहेको छ । तर, त्यही अध्यादेशबाट फुटेका जनता समाजवादी पार्टी (जसपा) र लोकतान्त्रिक समाजवादी (लोसपा) का नेताहरु भने कम्युनिस्टहरुजस्तो चर्चामा छैनन् । सम्भवतः सानो पार्टी भएकाले पनि जसपा र लोसपाको झगडा उत्तिसाह्रो मिडियामा नआएको हो ।

 


मिडियामा चर्चा नभए पनि खासगरी प्रदेश २ मा जसपा र लोसपाको झगडा ओली र माधव नेपालको भन्दा कम छैन । एकले अर्को समूहलाई पत्तासाफ हुने र क्लिन स्वीप हुनेसम्मका दाबी जसपा र लोसपाका नेताहरुले गरिरहेका छन् ।


पार्टी विभाजनपछिको स्थिति के छ भनेर रातोपाटीले सोध्दा उपेन्द्र यादव नेतृत्वको जनता समाजवादी पार्टीका कार्यकारिणी सदस्य इस्तियाक राईले आगामी चुनावमा लोसपा पत्तासाफ हुने दाबी गरे ।


विभाजनको असरबारे जसपा नेता राईले रातोपाटीसँग भने, ‘स्थानीय तहमा ८० प्रतिशत प्रतिनिधि हाम्रो पक्षमा छन् । प्रदेशमा पनि हामीसँग ७५ प्रतिशत छन् भने उहाँहरुले ३० प्रतिशतमा चित्त बुझाउनु परेको छ । संघमा हामीसँग ६० प्रतिशत र उहाँहरूसँग ४० प्रतिशत छन् । लोसपाभन्दा हामी सबै ठाउँमा बलियो छौं ।


महन्थ ठाकुर नेतृत्वको लोसपाका नेता उमासंकर अरगरिया भने मधेसमा सबैभन्दा ठूलो पार्टी लोसपा नै हुने दाबी गर्छन् । ‘जसपा विभाजनको कारणले मधेसीलाई फाइदा भएको छ । किनभने जसपा कुनै मधेसवादी दल थिएन’ अरगरिया भन्छन्, पार्टी विभाजन गरेर लोसपा गठन भयो, त्यसले मधेसलाई फाइदा भएको छ । मधेसले एउटा असली पार्टी प्राप्त गरेको छ ।’


दुबै पक्षले आ–आफ्नो दाबी गरिरहँदा जसपा र लोसपाको विभाजनले मधेसलाई कस्तो असर पारेको छ भन्ने तथ्यपरक विश्लेषणहरु खासै बाहिर आउन सकेको स्थिति छैन ।

यसै सन्दर्भमा हामीले जसपा नेता इस्तियाक राई र लोसपा नेता उमाशंकर अरगरियासँग दुबै पक्षका कुराहरु सुन्नका लागि वार्ता गरेका छौं ।

पहिले जसपा नेता इस्तियाक राईको कुरा सुनौं–

आगामी चुनावमा लोसपा ‘क्लिन स्वीप’ हुन्छ

 

 

 

तपाईंहरुको जनता समाजवादी पार्टी विभाजन भएको छ, त्यसले जसपालाई फाइदा भएको छ कि बेफाइदा ?

पार्टी विभाजनले फाइदा हुँदैन । पार्टी फुट्नु हुँदैनथ्यो तर केही नेताको हठका कारण विभाजन भयो । जसपा विभाजन हुँदा कसलाई फाइदा र कसलाई बेफाइदाभन्दा पनि मधेसलाई घाटा लागेको छ । मधेश जनता यसबाट निकै दुःखी छन् ।

पार्टीमा दुईचार सीट यता वा उता हुनसक्छ । तर, विभाजनले नराम्रो सन्देश गएको छ । यसले महन्थ ठाकुर र राजेन्द्र महतोलाई कुनै असर परेको छैन । किनभने उहाँहरु पार्टी विभाजनमा ख्याति प्राप्त गर्नुभएको छ ।

यसअघि पनि पार्टी विभाजनमा महन्थ र राजेन्द्रहरुको हात थियो । उहाँहरुले प्लानिङ गरेर पार्टी विभाजन गर्नुभएको थियो, जुन काम उहाँहरुले अहिले पनि गरिरहनु भएको छ । त्यसैले जसपा विभाजनले मधेसलाई असर गरेको छ ।

महन्थ र राजेन्द्र महतोहरूले मधेसको मुद्दा, अधिकार र पहिचानमाथि कुठाराघात गर्नुभएको छ । लोकतन्त्रलाई धज्जी उडाउनुभएको छ । केपी शर्मा ओलीले संसद विघटन गरेर प्रतिगामी कदम चाल्नु भएको थियो, त्यसमा उहाँहरुले पनि साथ दिनुभयो । अहिले आएर शेरबहादुर देउवालाई समर्थन गर्नुभयो । सुरुमै देउवालाई समर्थन गरेको भए आज देशमा यो अवस्था आउने थिएन तर महन्थ र राजेन्द्रका कारण देशमा यो अवस्था आएको हो । त्यसैले उहाँहरुको क्रियाकलापले गर्दा जनतालाई बेफाइदा भएको छ ।

जसपाबाट उहाँहरु निस्किँदा कति प्रतिशत नेता–कार्यकर्ता लैजानुभयो ?

प्रतिशतकै कुरा गर्ने हो भने स्थानीय तहमा ८० प्रतिशत प्रतिनिधि हाम्रो पक्षमा छन् । प्रदेशमा पनि हामीसँग ७५ प्रतिशत छन् भने उहाँहरुले ३० प्रतिशतमा चित्त बुझाउनु परेको छ । संघमा हामीसँग ६० प्रतिशत र उहाँहरूसँग ४० प्रतिशत छन् । र, फेरि पनि भन्छु, प्रतिशत वा संख्या कुनै ठुलो कुरा होइन, संघीयता, लोकतन्त्र, समावेशिता मुख्य कुरा हो । त्यसमा को प्रतिवद्ध छ, कसले बेइमानी गरिरहेको छ, त्यसलाई पनि हेर्नुपर्छ । फेरि पनि, संसदीय राजनीतिमा संख्याको पनि ठुलो महत्व हुन्छ ।

जसपाबाट अलग भएर उहाँहरुले लोसपा गठन गरिसक्नु भएको छ । संगठनात्मक रुपमा तपाईहरु कुन प्रदेश, जिल्ला, स्थानीय तहमा सबैभन्दा बलियो हुनुहुन्छ ?

लोसपाभन्दा हामी सबै ठाउँमा बलियो नै छौं । प्रदेशको कुरा गर्ने हो भने उनीहरु सातै प्रदेशमा शून्य छन् । लुम्बिनीमा लोसपा शून्य छ, १ नम्बर प्रदेशमा शून्य छ । प्रदेश २ मा अलिअलि उहाँहरुको उपस्थिति छ । तर, प्रदेश २ मा पनि जसपालाई टप्न सकेको अवस्था छैन । जसपाभन्दा लोसपा धेरै पछाडि छ ।

निकट भविष्यमा चुनाव आइरहेको छ, त्यो चुनावमा खासगरी तराई मधेसमा तपाईंहरुको प्रतिस्पर्धा लोसपासँग नै हुन्छ, होइन ?

अबको चुनावमा लोसपा ‘क्लिन स्वीप’ नै हुन्छ । चुनावमा पनि यो पाँच दलीय गठबन्धन कायम रहन्छ । गठबन्धन दलहरु सँगै मिलेर चुनावमा जाने कुराकानी भइरहेको छ । त्यस अवस्थामा लोसपा धेरै पछाडि पर्छ । लोसपासँग न कुनै प्रतिस्पर्धा हुन्छ न त प्रतिस्पर्धा हुने अवस्था नै छ । चुनावमा प्रतिगमनकारी शक्तिहरूको बीचमा पनि गठबन्धन होस् । चुनावमा एउटा अग्रगमनकारी गठबन्धन हुन्छ भने अर्को प्रतिगमनकारी गठबन्धन हुन्छ ।

यसको मतलव, जसपा विभाजनले तपाईहरुलाई फाइदा नै भएको छ, तत्कालीन समाजवादी पार्टीभन्दा बढी संख्या तीनवटै तहमा भएको छ, यो त फाइदा नै भयो नि, होइन ?

यसलाई फाइदा भनिँदैन । संख्या ठूलो कुरा होइन, मुद्दा ठूलो कुरा हो । लोसपावालाले मुद्दा समाप्त गरेको छ । प्रतिगमनलाई साथ दिएको छ । संसदजस्तो गरिमामय संस्थालाई विघटनमा सहयोग पु¥याएको छ । यसले गर्दा मैले अघि पनि भनेको थिएँ कि संख्या ठुलो कुरा होइन, मुद्दा ठुलो कुरा हो ।

अब लोसपा नेता उमाशंकर अरगरियासँगको कुराकानीः

पार्टी फुट्दा मधेस खुशी छ, लोसपा मधेसको ठूलो पार्टी बन्छ


जसपाबाट विभाजन हुँदा तपाईहरुलाई फाइदा भयो कि बेफाइदा ?

जसपा विभाजनको कारणले मधेसीलाई फाइदा भएको छ । किनभने जसपा कुनै मधेसवादी दल थिएन । जसपा आफूलाई राष्ट्रिय पार्टी भन्थ्यो । त्यो पार्टीमा डा.बाबुराम भट्टराई, राजेन्द्र श्रेष्ठ, अशोक राई, गंगा श्रेष्ठ, डम्बर चेम्जोङलगायतका नेताहरुको हालीमुहाली छ । त्यो मधेसको हितमा गठन नै भएको थिएन । त्यसैले त्यो पार्टी विभाजन गरेर लोसपा गठन भयो, त्यसले मधेसलाई फाइदा भएको छ ।

मधेसले एउटा असली पार्टी प्राप्त गरेको छ । मधेसको हकहितमा बोल्ने पार्टी प्राप्त गरेकोे छ । हाम्रो लडाई यो देशका खस आर्यसँग छ । काँग्रेस, माओवादी केन्द्र, एमालेमा खस आर्यको बाहुल्यता त छ नै, जो दल आफूलाई तथाकथित मधेसवादी दल भन्थ्यो, त्यो दलमा पनि खस आर्यको बाहुल्यता छ । त्यो दलले मधेसको कल्याण हुन सक्दैन । जसपाबाट अलग भएर लोसपा गठन भएपछि मधेस धेरै नै खुशी छ ।

तपाईहरु जसपाबाट अलग भएर लोसपा नेपाल गठन गर्दा कति प्रतिशत कार्यकर्ता, नेता तान्न सफल हुनुभयो ?

हेर्नुस्, संख्या वा प्रतिशतले कुनै ठुलो अर्थ राख्दैन । राम्रो उद्देश्यले हिँड्दा बाटोमा कोही राम्रो मान्छे पनि भेटिन्छन्, कोही नराम्रो पनि भेटिन्छन् । ट्रेनमा हिँड्दा कोही मान्छे चढिरहेका हुन्छन्, कोही ओर्लिरहेका हुन्छन् ।

कुनै प्लेटफर्ममा ट्रेन पूरै खाली हुन्छ भने कुनैमा कोही पनि ओर्लिदैन । यो आवश्यकता र परिस्थितिले भइरहने चिज हो । आज कसैसँग अलि बढी प्रतिशत होला, भोलि अरु कसैसँग हुनुसक्छ । त्यो ठुलो कुरा होइन । मुख्य कुरा, एजेण्डा र लगाव हो ।

जसपाका उपेन्द्र यादवसँग दुई/चार जना बढी नेता होलान् तर मधेसी जनता उहाँसँग छैनन् । विभिन्न लोभ, लालच दिएर नेताहरुलाई आफ्नोतिर तान्न सफल हुनुभयो तर आम जनतालाई तान्न सक्नुभएको छैन । ती जनता हामीसँग छन् । आउने दिनमा मधेसमा अब दुईटा पार्टीमात्र रहन्छ । एउटा हाम्रो लोसपा र अर्को सिके राउत नेतृत्वको जनमत पार्टीमात्र मधेसमा रहन्छ । जसपा खस आर्यको पार्टी भइसक्यो । उसले मधेसको पार्टी हो भनेर दाबी गर्न मिल्दैन ।

अहिले तपाईंहरुको पार्टी लोसपा कुन जिल्ला वा प्रदेश सबभन्दा बलियो छ ?

म जहाँ जान्छु, त्यहाँ लोसपा नै बलियो देख्छु । एक÷दुईटा ठाउँमा कतै जसपा बढी होला । प्रतिनिधिमुलक संख्या उहाँहरुसँग बढी होला तर मास हामीसँग छ । म अस्ति पश्चिम मधेस गएको थिएँ । त्यहाँ पनि लोसपा बलियो नै देखेँ । प्रदेश २ मा उपेन्द्र यादवको सरकारले स्थानीय प्रतिनिधि र प्रदेश सांसदलाई विभिन्न लोभ दिएर पार्टीमा ल्याएको छ । तैपनि लोसपा कमजोर छैन । प्रत्येक जिल्ला लोसपामय भएको छ ।

निकट भविष्यमै चुनाव आइरहेको छ । त्यो चुनावमा जसपा बलियो हुन्छ कि लोसपा ?

अरु ठाउँ त भन्न सक्दिनँ, तर मधेसमा लोसपा बलियो हुने निश्चित छ । जसपा राष्ट्रिय पार्टी हो, त्यसमा अधिकांश नेता पहाडी समुदायका छन् । हिमाल, पहाडमा पनि संगठन बनाएको भनिन्छ । उतातिर के हुन्छ थाहा छैन । तर, मधेसमा यसपालि जसपाको पत्ता साफ हुने निश्चित छ । अहिले विभिन्न प्रलोभन दिएर नेता तथा कार्यकर्तालाई पार्टीमा भेला पारेका छन् । जब ती प्रलोभन अनुसारका कुराहरु पाउँदैनन्, अनि ती नेताहरु लोसपामा नै फर्किन्छन् । मधेसमा सबभन्दा ठूलो पार्टी लोसपा नै हुनेछ ।

कसरी ?

–लोसपासँग एजेण्डा छ, लोसपासँग मुद्दा छ, लोसपासँग विचार छ, लोसपासँग कार्यकर्ता छन् । लोसपाले मधेसको माग पूरा गराएको छ र बाँकी माग पनि पूरा गराउन प्रतिवद्ध छ । लोसपाले मधेसी जनतालाई धोका दिएको छैन ।

त्यही भएर अगामी चुनावमा मधेसमा लोसपा सबभन्दा ठूलो पार्टी बनेर देखाइदिन्छ । मधेसका जनताले मधेसमा एकता चाहेका थिए । तर उपेन्द्र यादवले त्यो एकता चाहनु भएन, आफ्नो दम्भ र हठका कारण जसपा विभाजन गर्नुभयो । जनतालाई सबै थाहा छ ।

–रातोपाटीबाट

प्रतिक्रिया दिनुहोस

सम्बन्धित शीर्षकहरु

सम्पूर्ण समाचार

माधव नेपाल ठुलो संयन्त्रकारी रहेको पुर्व प्रदेश प्रमुख धर्मनाथ यादवको आरोप

विन्दे यादवसिरहा / लुम्बिनी प्रदेश (प्रदेश नम्बर ५) का पुर्व प्रदेश प्रमुख धर्मनाथ यादवले माधव नेपाल ठुलो

संविधान दिवसका दिन जसपा मौन बस्ने, लोसपाले कालो दिन मनाउने

संविधान संशोधनलाई मुख्य एजेन्डा बनाएका दुई दलमध्ये जनता समाजवादी पार्टी नेपालले असोज ३ अर्थात् संविधान

मधेसको राजनीति

–भोला बनियामधेस नेपालको एउटा यस्तो अभिन्न भाग हो । जहाँबाट देशले आफ्नो अर्थतन्त्रलाई चलायमान बनाएको छ

सुचना तथा प्रसारण विभाग: ९७८–२०७५/७६

Copyright © 2013 / 2021 - Madheshspecial.com All rights reserved

प्रेस काउन्सिल नेपाल: २४६–२०७५/७६